IG Gärtner Bamberg

Die Zwiefl is die Heilbpfloonzn des Jooäs

A Beidrooch vom Zendrum Weldärbe Bambäch zum UNESCO-Weldooch deä Muddäschbrooch om aanäzwandsigdn Februar.
 

Immä im Häbsd weän Bfloonzn un Dierä füän nägsdn Jooä geküäd. Füä zwadausndfuchzä is die Zwiefl Heilbfloonzn des Jooäs woän. Un mid derra sän miä Bambächä ja fosd scho väwuäzld will mä soong. Uns nännd mä ja a ned ummäsünsd „Zwiefldredä“..

 

Deä bodonisch Noomä vo deä Zwiefl is „Allium cepa“ un die köäd zu die Lauchgwächse, a wenn miä stood Lauch Boree soong. Un miä blaudän doo fei ned vo irchänd aanä Zwiefl, denn doo gibds an Haufn, des gehd doo um die essboä un gsund Gmüszwiefl. In Bamberch gibds doo a goonz a bsondära die „Bambächä birnaföämicha Zwiefl“. Die hod, des soochd ja ihr Bamberger ZwiebelNoomä scho, a longa birnaähnlicha Foäm un schmäggd, im Vägleich mid onderra Zwiefln, süß un mild. Ihra Sooma wan, zam mit onderra Zwieflsooma, im 15. un 16. Jooähundäd a Aushängeschild Bambächs un im 17. un 18. Jooähundäd sogoä a Exbordschloochä deä Bambächä Gärdnä. Einglich hod mä scho gmaand die Soodn sei välooän ganga abbä zwadausendzwölf hod deä Meiers Heinrich dem Bambächä Soodngaddn seina ledzdn booä Sooma geem und doäd hod mä sä widdä aufgebäbbld und so voäm Ausschdärm bewoord. Seid dem Jooä is die Bambächä Gärdnärei a auf deä Bayrischn Londäslisdn des immaderielln Kuldurärbes. A gudda Voraussädzung ums a auf die indeänodtionol UNESCO-Lisdn des immaderielln Kuldurärbes zu baggn.

Obä woorum nennd mä uns eddzädla „Zwiefldredä“? Des is simbl: Frühä konnd mä om Änd vom Juli immä allä Gärdnäfamilien mid Breddla undä die Schu säng wie sä übä ihra Zweiflfeldä gschdapfd sän, um die Schloddn, die Bläddä vo dä Zwiefl, bladd zä sabbn. Des hod mer gmochd damid die Nährstoffä aus die Bläddä nei die Fruchd sän und die Zwiefl größä worn is.

Un wie hilfd uns eddz die Zwiefl heud, außä als „Bambächä Zwiefl“ geechän Hungä? Ols Nohrungs- un Wüäzmiddl wiägd sä bei Abbedidlosichkeid, a wenn dees bei uns Bambächä ned so ofd voä kommd. A oldersbedingdä Gfäßveäändärunga beuchd sä voä. Sie is a gudds Middl gechä Husdn un Rheuma. Sie sängd den Koläsderinspiechl un soll a beim Feddabbau a Rolln schbieln. Ka Wunnä also, dos deä Bro-Kobf-Väbrauch in Deudschlond bei vieäzäh Bfund Zwiefln liechd un im goonz Lond zirga neundausnd Heggda domid ongebflonzd wän. Eddz müss meä blos noch schaua, dass die Leud a alla unsä Bambächä Zwiefln kaafn und essn. Die schmeggn subbä un sin gsund, sogä vegan sin sä.

 

 

 

Dii waas nu määr do drieber:                                                 Weitere Informationen zur Lokalsorte Bamberger Zwiebel

 

Frau Patricia Alberth

Zentrum Welterbe Bamberg      
Leiterin                                     
Geyerswörthstraße 3                   
96047 Bamberg     

                    

0951  87-1810    

  0951  87-1983

  Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

  www.welterbe.bamberg.de